女兒房設有三呎油壓床，揭開床板就有大量儲物空間，配合弧形床頭板同窗前書枱；兩房之間嘅雙面間房櫃，同時將部分儲物空間分享俾主人房使用。主人房同樣以暗門做間隔，設有四呎油壓床、高身衣櫃、可收起嘅趟鏡同高身梳妝枱。廚房同洗手間之間嘅牆身特別安裝咗白色磁石板，可以用作家庭留言板。洗手間配備一體式洗手盆同智能鏡櫃，熱水爐下方更做咗收納箱遮蓋喉管；廚房保留原有牆磚再貼上碳晶板，防水防潮易打理，鑽石型鋅盆放喺角落令枱面更寬敞，吊櫃仲加設咗拉籃，唔使梯都攞到高處物品。